Skip To Content

「細味人情」故事
新舖舊情 世代傳承

「我響嘉咸市集做咗三十幾年喇,呢幾十年個市集多咗好多新嘢。好似上個月新開幕嘅鮮貨零售中心,我喺度多咗呢間新舖,賣多咗啲新品種同新來源地嘅菜同蔬果。好似呢啲荷蘭蕃茄,係我兩個仔入貨,好好賣架,一日食幾粒可以抗氧化。」 華記果菜老闆娘華姐在位於鮮貨零售中心的新舖內忙著整理來自不同國家的新鮮果菜,還細心地加上英文字牌。「而家呢度多咗好多外國人黎買嘢,所以要加番啲英文字牌,等啲客知道賣緊啲咩,我哋做生意嘅都要與時並進。不過我英文唔叻,而家全靠兩個仔幫手同外國人買貨賣貨。」

華姐的大兒子Mango及小兒子Anson,就是華記果菜的新一代接班人,他們三十出頭,放棄收入穩定的白領工作投身街市,為的是傳承父母白手興家建立的果菜生意。Anson說:「經常有人問我,點解咁後生就做街市?  嘉咸市集呢度就有唔少後生仔同父母一齊打拼,仲加咗唔少新嘅idea。」大哥Mango主要負責賬目、人事及所有「舖內」的事務,而弟弟Anson則負責銷售、推廣、客戶關係等「舖面」的事務,兩兄弟拍住做。

華記果菜創辦人華叔及華姐兩夫妻,就如不少嘉咸市集商戶一樣,世代相傳經營祖業數十載。「我老爺奶奶幾十年前已經響呢度賣菜,開初只賣薑、冬瓜、薯仔、蕃茄、紅蘿蔔及椰菜,我同老公幫手睇檔,之後接咗黎做,見人哋賣啲通菜、菜心呢啲水菜愈賣愈好,我哋又跟住賣,結果做到而家。」  笑言自己嫁入嘉咸市集的華姐,對市集感情深厚。「我第一間舖響嘉咸街23號,一路做咗幾十年,識咗班熟客,日日有講有笑,雖然工作辛苦,晨早四、五點要起身,但一見到班街坊就好開心。」

2007年市建局開展卑利街/嘉咸街發展項目,項目範圍外就是這個擁有百年歷史的市集, 而華姐的商舖則位處重建項目內。 一個熟悉的社區面臨重建,華姐難免憂慮是否因而要離開這個陪伴了她十多年的地方。「當時擔心如果收咗我間舖,我未必搵得番附近嘅舖位,又要交貴租,未必捱得住。」 華姐也擔心重建會令她與附近相熟的商販及街坊各散東西:「我哋呢班嘉咸市集商販已經好似一家人咁,我唔會搬去第二度做,因為搬走咗未必搵得番一班咁好嘅朋友。」

「當市建局話要收返我間舖作重建之用,我已打算如果搵唔到合適嘅新舖,就乾脆結業。」華姐已作最壞的打算,「幸好當時市建局時常派人到市集同受影響嘅商戶解釋重建嘅內容及安排,佢哋唔係就咁通知你重建,或者擺低份文件之後就唔理你,反而經常關心吓我哋有咩需要。我哋都將心中嘅擔憂講出黎,希望佢哋可以安排我哋呢班商販留番響市集繼續做生意。」

 為了延續嘉咸市集,市建局特別在卑利街/嘉咸街發展項目內興建一座鮮貨零售中心,以容納選擇遷回該項目的新鮮食品商戶,華姐就是其中之一。 該項目的三個地盤亦分期進行工程,令商販可以被安排至項目範圍內尚未清拆的舖位繼續營運至鮮貨零售中心落成啟用。

「好彩當時市建局肯幫我哋呢班商販。佢哋知我想留番響市集繼續做生意,就搵咗個響卑利街嘅舖位俾我做住生意先。」   

華姐在市建局安排的臨時舖位經營果菜生意3年,其後搬到結志街另一舖位繼續營運,在這數年間,她與市建局一直保持緊密溝通。「市建局啲職員好清楚咁同我哋講解第日新嘅鮮貨零售中心會係點,同埋點樣安排舖位俾我哋,我都投咗兩個新舖呀!  我成日同啲街坊講,我哋呢班中環檔販好幸運,好多地方拆樓無賠償又唔會安置,而家我哋可以安心繼續做生意,仲可以響老地新舖重聚。」


提及新舖,華姐感到很滿意。「搬入黎之前市建局同我哋都開左好多次會,問我哋想將間新舖點整,又整啲模型俾我哋睇,等我哋知道將來間舖整好之後係點樣。而家間新舖整得好靚,又光猛又開揚,又有洗手間,我哋都唔駛點樣裝修,就可以搬入去做生意。」華姐又指新舖就在舊舖的斜對面,這個遷置安排令她留住一班舊客;而新舖面向熙來攘往的結志街,人流多,新客舊客都容易找到,對生意有幫助。

「而家條行人路整闊咗,方便市民行街買餸,附近嘅登山電梯又帶多好多新客來買果菜,好似啲外籍人士、酒店大廚、藝人明星、甚至住喺新界嘅熟客都黎幫襯。成個舊區發展咗之後多咗好多新元素,有新舖位、有新貨品,仲多咗年輕人入行。好似隔離肉檔個接班人同助手都係後生女黎架。」

華姐看著嘉咸市集變得年輕化,她自己也打算退下火線,讓年輕一代接棒,現時她已逐步將果菜生意交予兩名兒子打理。問華姐有否「過兩招」予兒子們,她笑道:「佢哋仲叻過我,成日留意飲食潮流同埋呢期啲客鍾意食咩,不時引入新貨,好似最近先入咗啲時興super food,即係好似羽衣甘藍呢類營養價值高嘅新式蔬菜,佢哋啲後生又識上網用電腦做生意,效率高好多。佢哋夠膽試夠膽做又肯學,唔駛教。」那麼退下來後,華姐有什麼打算? 「梗係去旅行玩吓啦,幾十年來淨係顧住做生意,都未有機會出去外面見識一吓。」有能幹的兒子們接棒傳承祖業,看來華姐很快可以願望成真。

嘉咸市集「行街買嘢」的傳統、舊區的老街坊、人情味,並沒有因重建而消失;重建發展反而為市集帶來新氣象、新的設施配套,這些新元素與舊傳統在這個社區調和、融合,並一直傳承下去。

 

更新日期 : 2017.01.13